كشفت الفنانة ياسمين صبري وللمرة الأولى عن أنها خريجة إعلام، وعلى أنها تحب علم النفس كثيرًا، وصرحت بتصريحات أخرى عن علاقاتها بأصدقائها.
حيث قالت الفنانة ياسمين صبري بخصوص علاقاتها وصداقاتها: ” معنديش صحاب كتير ولا شلة ممكن عندي صاحبة واحدة بس، يمكن ده يرجع لتربيتي عشان حياتي كلها كانت في التمرين وكنت بضايق وأحس إن ده عذاب بس ده حماني من أخطاء كتير كان ممكن أقع فيها.
وأضافت عبر لقائها مع أنس بوخيش عبر قناته الرسمية على يوتيوب: “وقت كورونا كان شبه حياتي العادية ما عدا السفر لأني بحب أسافر أوي وأنا بعرف استثمر وقتي، وأنا خريجة إعلام ولكن ديمًا عندي شغف تجاه علم النفس وأول كتاب قرأته كان اسمه The Secret، والموضوع اتطور وقررت أدرس في جامعة هارفرد علم نفس، واخدت 3 كورسات منهم علم النفس الاجتماعي والمرونة النفسية”.
وتابعت ياسمين بقولها ” مايضيقنيش إن الناس تحصرني في قالب ست جميلة، لأن الشخص ده بيحدد لنفسه النظرة دي وهو اللي محدود مش أنا، وفيه حاجة في الطاقة أحب أعلمها للناس وهو إن أي شيء سلبي وبالأخص لو كان حكم عليك يعتبر فرصة ليك إنك تحوله للشيء اللي أنت عايزه”
وعن إجابتها لسؤال من هي ياسمين صبري، وعن شخصيتها قالت بأنها: “شخصية متغيرة وتتتغير كل فترة وتتطور باستمرار للأفضل، قائلة: «ياسمين حاجات كتير قوي ولو سألتني السؤال ده من سنة هقولك حاجة ولو سألتني دلوقتي هقولك ياسمين حاجة تانية، ولو سألتني كمان 5 دقايق قدام هبقى حاجة مختلفة، وفيه ناس فاكرة إن أنت لما تتغير دي حاجة وحشة لأن المفروض مش لازم أثبت على حالي والتغيير إنك تبقى متطور”
وأضافت عن شخصيتها والتناقضات التي تحتويها بإعتبار أنها مثل باقي البشر حيث صرحت بقولها: “«أنا حاجات كتير قوي أنا الخير والشر والجمال والقبح وأنا كل شيء ونقيضه”.
وأضافت وعبرت عن نفسها بقولها: “احنا اتخلقنا كده أصلا وهي دي الفكرة من وجودنا خلفاء لربنا في الأرض وإنك تدور على الحلو وتطلع الحلو وتجاهد نفسك وتجاهد في جسمك وتهذب روحك، فأنا حاجات كتير قوي”
وكان من ضمن الحوار اعتبار أنس بوخش بأن أجوبتها نموذجية، وأوضحت بقولها بأن هذه هي حقيقة شخصيتها “دي ياسمين اللي أنا اعرفها وأهم حاجة إني أبقى عارفة نفسي وأنا أحب اربط الدين قوي يعني رحم الله امرئ عرف قدر نفسه لأنه شيء صعب، ودي رحمة من ربنا وأنا عشان عارفة نفسي هي دي حقيقتي، وأنا فعلا شفافة”.
